Tiphekele ligusha ngendlela lelula

Tiphekele ligusha ngendlela lelula

Ligusha ngulokunye kwekudla lokudvudvutako, lokudla loku kukudla lokukubuyisela ekhaya ngekushesha, kukukhumbute emuva. Kuvame kuphambaniswa namandwandwe ngalesimo sakhe sekushelela kodvwa ligusha mbamba liphekwa ngekusebentisa emacembe e-ligusha labitwa nge (jute mallow ngesilumbi), lamacembe anika lesidlo umbala waso loluhlata lowehlukile kanye nekuma lokumunyu, lokunemsoco.

Banengi ke labasitsandzako lesidlo lesi kodvwa abakwati kusipheka, emacembe eligusha ayamila emataleni,etinsimini nasetigangeni, nawudibana nalo ke vele ulicuntse, namuhla ngikuletsela indlela lemelula yekulipheka lijabulelwe nguwonkhe muntfu ekhaya.

Titsako

Emacembe lalingene eligusha

2 tipunu emafutsa ekupheka

1 anyanisi losemkhatsini, locotjwe waba muncane

2 ematamatisi lavutsiwe

1 sipunu  bakhabhonethi yesoda

Luswayi lwekunambitsa

1 likomishi lemanti noma stock

Indlela yekupheka

• Cala ngekulungisa emacembe eligusha. Susa tonkhe ticucu leticinile bese ugeza lamacembe ngemanti lahlobile kute ususe umhlabatsi. Tsatsa lamacembe uwacobe kahle nangabe ufuna kube melula noma asheshe avutfwe.
• Beka libhodo estofini usebentise umlilo losemkhatsini bese ufaka emafutsa ekupheka lalingene. Nasekushisa lamafutsa, yengeta anyanisi locotjiwe bese upheka aze avutfwe atsambe. Faka lamatamatisi lacotjiwe bese uwavumela kutsi aphekeke kute kube ngulapho akha umshibo  lotiyile lonuka kamnandzi.
• Yengeta lamacembe e-ligusha lacotjiwe ebhodweni lelinalomshibo wa anyanisi na tamatisi bese uyawuhlanganisa kahle.
• Tsela emanti nobe stock, wehlise lizinga lekushisa estofini bese uvumela lamacembe eligusha kutsi abile kancane. Nakaphekeka lamacembe atawugucuka ashubise lesidlo.
• Vumela ligusha kutsi libile emaminitsi lalishumi kuya kulalishumi nesihlanu, ulitamatise kancane kancane, lize liphekeke ngalokuphelele futsi libenekucwebetela.
• Nalivutfwa kufanele libe ngatsi liyancipha  ungalivumeli kutsi lome. Faka emanti lamancane nakudzingeka.

Ligusha limunandzi nawulidla ngeliphalishi lelicinile,labanye balidla  ngelidombolo noma lilayisi. Lidliwa kahle nenyama letfosiwe lokwenta kube sidlo lesinemphilo. Lendlela yekuphe ligusha imelelula, futsi ayibiti kakhulu.